RANDAU JERITA LAMA: TUSUN ADAT BASA PEMATI IBAN BAGI MENUA LAYAR ULU, BETONG

Dikarang: Nicholas J. Ugik (BA, Soc. Sce, UMS)

Asal Adat Ngintu Pemati Kitai Iban

Daya pengidup bansa Iban endang bechuan ba adat enggau penti pemali

Ba pengawa ngintu pemati, kitai Iban ngembuan adat enggau penyiru ba urang udah ninggal enggau bala sida sebilik ti udah ditinggang penusah. Nitih ke dipansik Chemalin Usop: 2011, nyadi atur ngintu pemati tu kenu ko kenang tuai menya bepun ari aki ini kitai ke benama Serapuh. Ba tubuh Serapuh maya nya menya, enti mensia bisi mati; bangkai sida dibuai ngapa baka ke muai bangkai uduk bangkai manuk, ditikau ka sengapa sebelah tanah enggau babas.

Pengawa ti ngintu pemati nadai ngena adat enggau lebas nyentuk ke sida Serapuh serumah nyau mati berunggu (Chemalin Usop, 2011). Ambi ke jaku, siku mati tengahari, siku mati muak ke lemai.

Nyadi sekali, Serapuh bisi ninga urang nyapa hari ujung tanju nanya nama kebuah sida serumah balat amat runggu enggau sinu. Serapuh nimbal urang nya ketegal ari sida serumah udah dituntung penusah pemati nyau ninting hari.

Sekali agi urang nya nanya chara sida Serapuh ngintu pemati. Serapuh lama enda bemunyi laban nadai kala ninga adat ngintu pemati. Serapuh lalu madah sida semina muai bangkai urang ke udah mati nya sebelah tanah.

Urang nya tadi madah ke chara sida Serapuh nya salah nya alai sida nyau betampung anjung mati. Iya lalu mesan Serapuh enggau adat ngintu pemati baka ke dikena kitai Iban ngintu pemati baka ke baruh hari diatu. Nya alai adat pemati kitai Iban digela Pesan Puntang Raga laban urang ke bejaku enggau Serapuh nya tadi Puntang Raga ti dianjung Petara kitai Iban iya nya Sempulang Gana.

Sapat ti digantung ngena Pua Kumbu nyerara menua sebayan
 enggau dunya mensia

Adat Basa Ngintu Pemati

Dalam pengawa ngintu pemati, kitai Iban ngembuan adat enggau penyiru laban ngenang ke basa enggai penusah bala diri sebilik ke udah ditinggal ke niang. Lalu pia mega, niang diintu ngena chara rabat enggau disempulang ngena baya laban kitai bansa Iban pechaya ke pengidup pengudah mati iya nya sebayan. Nitih ke ditulis Sultive: 1989, bansa Iban tu siti ari bansa ti ngembuan atur enggau adat dalam ngereja semua pengawa baik bumai, niri ke gawai enggau ngintu pemati.

Kelimpah ari tu tadi, bansa Iban mega bisi ngembuan atur penerit adat ba rumah panjai di dikumbai “Tusun Tunggu” (Gerunsin Lembat, 1989). Berangkat ari tu tadi, Tusun Tunggu meh dikena pemegai tampuk adat kitai bansa Iban bejalai ke adat ti nyadi malin enggau lalau pengidup kitai bansa Iban.

Ba pengawa rabat tauka ngintu pemati mega, kitai Iban bisi ngena adat baka ngulit iya nya dikena bebasa ke timpuh ngulit pemati ti dikena madah ke penyinu ati nuju bala niang sebilik ti udah ditinggang penusah. Ba bagi menua Saribas kelia, timpuh ulit tu enti kelia manggai ngagai tiga bulan. Dalam kandang ulit tu tadi, pengerami enda tau digaga ba rumah panjai ke udah ditinggang penusah mati tu. Lalu pia mega, balu enggau sida sebilik ke udah ditinggang penusah mega nadai tau dipeda berias, nganta tauka ngulu pengerami ti digaga urang ari ulu enggau ari ili rumah panjai sida. Barang bagi sapa ti ngelanggar atur tu deka diukum ngena penyampau adat ti udah diletak maya ke berandau ke adat ba malam nyenggai bala mayuh. Maya nya bala temuai enggau kaban belayan ti udah sampal datai sama ninga lalu ngingat ke adat pemati ti udah disebut pemegai tampuk adat.

Adat Basa Pemati Iban Saribas

Lebuh kitai ke ngenang jerita lama, pengidup kitai Iban endang besangkut paut enggau gaya kitai bulih tajau. Nitih ke pansik Benedict Sandin: 1980, kitai Iban bulih tajau ari perapasan nurun ngayau enggau maya ke nurun bejalai ngagai menua urang. Tajau tu tadi nyadi tanda pangkat tauka status kitai dalam genturung pendiau rumah panjai. Benedict Sandin: 1980, mega bisi madah ke ukum adat kitai Iban diletak ka ba tajau tang diatu udah dipuntang ke ngagai mata duit. Baka ukum ti ngelanggar atur rumah panjai selalu endar diletak ba bansa tajau. Pengabis mit baka seigi jabir tauka besai mimit seigi panding. Tang maya dunya nyau majak mansang, penyampau ukum ti diletak ba seigi jabir dipuntang nyadi RM1 enggau ba seigi panding dipulai ka nyadi RM2.

Ba randau interbiu penulis enggau siku urang ke landik ba pengawa adat kitai Iban iya nya niang Tunggay Anak Mula, iya madah ke adat basa pemati Iban Saribas tu endang diletak ba tajau. Tang taja pia, tikas adat entara menua dalam Saribas enda sama laban nitih ke atur Penghulu Ulin kelia. Penghulu Ulin bisi nanya bala tuai raban bansa ari Rimbas, Paku, Ulu Layar, Spak enggau Ili Layar ba pengulih bala rayat sida begiga ke tajau. Nyadi saut bala tuai raban bansa tu tadi enda sebaka laban bisi madah ke bala rayat diri bisi udah bulih tajau rusa, bisi madah ke bala rayat diri bulih sergiu, bisi madah ke diri udah bulih menaga lalu pia mega semina madah ke naka bulih jabir tauka alas. Ari tu tadi tikas adat entara menua ke udah disebut aku nya tadi enda sebaka laban bechuan ba pengulih urang ke dulu suba ba pengawa bulih tajau (Tunggay Mula, 2016).

Ari nya tadi, Pengulu Ulin lalu ngeletak ka atur adat basa pemati tu tadi enda sebaka iya nya bala ari sitak Rimbas enggau Layar Ili ulih mai adat ke besai agi. Muak ke ai Spak baruh agi ari Layar Ili. Udahnya ari Nanga Spak nyentuk ka Layar Ulu ulih mai adat baruh agi ari Batang Spak. Lalu pia mega, sida Batang Paku tikas adat sida iya baruh agi ari Layar. Kebuah pia, laban urang jeman nya menya endang nyengenda tajau ti dikena lalu ukai dipulai ngagai mata duit baka kitai ke baruh hari diatu. Nya alai, enti nadai penatai pemisi ke meruan,segi ka pedis bebeli ke tajau jeman nya suba.

Nya alai suah kitai ninga enti urang Layar Ili adat pemati iya ulih mai seigi alas iya nya mata duit RM4, urang ari Spak Ulu semina ulih mai jabir tiga tauka RM3 lalu muak ke Paku adat pemati sida semina seigi jabir RM1 tauka seigi panding iya nya RM2.

Adat tu tadi ukai diputuska siku urang tang ari aum enggau penemu pemegai tampuk adat kelebih agi sida ke tuai raban bansa enggau beserimbai pendiau enggau urang ke udah ninggal tu tadi. Nitih ke kenang sida ke tuai, adat basa pemati tu diletak setipak enggau pengidup iya ba dunya tu. Nadai tau diletak kelalu besai tauka kelalu mit laban iya deka nanggul pengidup bala sida niang sebilik ke agi idup. Enti niang nya diletak adat kelalu besai tang iya enda setipak ke adat nya deka narit jalai pengidup tauka pengeraja sida ke agi idup tau ambis lengis enggau dituntung penusah bukai. Berindik ari pekara tu, nya alai adat basa pemati digaga enggau naka ulih penyimat ngambi ke nadai nanggul ba batang pengidup.

Tajau nyadi ke pesaka bansa Iban. Kelia menya, tajau tu nyadi tanda
 status lalu tikas adat ba Tusun Tunggu

Dikena nerang ngagai bala mayuh, reti adat basa pemati ke bisi mai jabir, panding tauka alas enggau rega iya enti dipulai ke ngagai mata duit besai reti guna iya. Keterubah, enti bisi urang ngelanggar atur dalam timpuh kandang ulit urang nya deka dtunggu ngena penyampau adat basa ke dibai niang mati. Ambi ke ke banding, enti niang mati mai jabir tiga reti nya urang ke ditunggu diletak mayar RM3 ngagai urang ke empu penusah.

Guna kedua iya nya dikena lemambang sabak ngeletak upah enggau ngatur tikas pengawa nyabak. Ambi ke chunto, enti niang ti mati nya siku urang beberita bulih utai, landik jari enggau beberita, iya deka mai adat basa abis kurang seigi alas. Nya alai chara lemambang ti nyabak bebuah bisi bida agi ari ke nyabak ke urang ke ninggal mai adat ke baruh ari alas. Enti mai alas tu, lemambang deka nyabak enggai enda digaga ke ranyai ba tisi sapat laban leka sabak iya ngerara buah ranyai ke disempama ke baka pengaya enggau pengeraja.

Lalu ketiga iya nya adat basa ke diletak bala pemegai tampuk adat tu tadi bisi guna maya ke pengawa ngambi entabalu laki tauka bini niang. Enti adat niang naka jabir tiga, adat entabalu iya diambi ngena jabir tiga.

Kepenudi iya nya ba renggat pengawa ke besai agi baka pengawa merantu semengat niang ba siti gawai besai Iban iya nya Gawai Antu. Ba pengawa Gawai Antu tu bisi siti renggat pengawa ke dikereja urang pengabis dulu sebedau nuduk ke gawai besai tu iya nya nganyam. Tukang anyam ti diinjau urang megai pengawa tu deka nganyam perengka sebayan baka ranggung garung nitih ke adat basa pemati ke diletak urang ba niang suba. Pemesai adat basa pemati ngasuh perengka ke di anyam enda sebaka.

Ranggung Garung ti dianyam maya pengawa Gawai Antu

Adat Basa Pemati Iban ba Menua Layar Ulu

Nyadi diatu kitai pulai ngagai batang kenang ba karang tu iya nya deka meda tikas adat basa pemati Iban ba menua muak ke Batang Layar. Nyadi adat pemati kitai Iban ba menua nya segi jauh bebida enggau ke udah dikenang aku dulu ari tu. Nitih ke kenang sida ke tuai ba jerita lama, tikas adat pemati muak ke Layar Ulu bechuan ke ari atur Penghulu Asun. Iya minta adat mit agi ari ke udah diperambu perintah laban iya meda bala nembiak redak iya ari Nanga Spak nyentuk ke Layar Ulu maya nya nadai meruan penatai pemisi sereta seranta. 

Urang Indu ti landik betenun landik ngaga pua kebat ulih
mai tikas adat basa ti besai

Bepun ari nya meh adat kitai Iban ba menua Layar Ulu mit agi enti dipulai ke ngagai mata duit. Nyadi ripih adat enti agi ba tajau agi sama baka sida ke ari Paku, Rimbas, Layar Ili enggau Batang Spak.

Nyadi randau aku enggau siku urang ti ngembuan penemu enggau pengingat ba  adat kami di pelilih menua Layar Ulu iya nya Tr. Bantan Anak Jerman endang madah ke ripih tajau ke dikena urang meri adat ngagai niang sebaka enggau sida ari Rimbas, Layar Ili, Paku enggau Batang Spak tang enti dipulai ke ngagai mata duit, endang mit ari penyampau ke udah dikenang aku dulu ari tu tadi (Bantan Jerman, 2020). sekali agi Tr. Bantan Anak Jerman madah ke adat basa tu bechuan ke atur niang Penghulu Asun kelia lalu nyadi ke malin bala rebak dudi diatu.

Nyadi letak adat pemati tau diperatika kitai ba ripih pangkat tajau baka ke di baruh tu:

Ripih Adat Basa/ Tikas Tajau	Mata Duit	Tikas Pengidup
(Nadai)	RM0.10	Enti anak mit mati maya iya ke agi mit tang apin tumbuh ngeli tang apai indai ka nyenggai niang baka atur rabat urang besai tuai, urang tau ngaga ngeli ke iya ngena bangkang. Enti anak mit nya udah tumbuh ngeli, endang patut disenggai ngena pengawa rabat. Lalu tikas adat anak mit tu apin ulih diletak ba bansa tajau tang diletak ba siti mata ginti. Reti nya adat basa iya mai siti mata ginti tauka mata duit RM0.10.
Menukul	RM0.30	Adat menukul tu selalu diletak ba nembiak ke ninggal ari iya ke udah tegar bejalai nyentuk ke iya nyau ka berangkat bujang.
Seigi Jabir	RM0.50	Ba menua pelilih menua Saribas enggau kelebih agi ba menua tunga ke Layar seigi jabir tu selalu iya digela ‘adat bansa’. kebuah pia, tu meh tikas adat basa urang besai tuai ti pengabis mit. Adat tu diletak ba urang ke apin belaki bebini ti ninggal enti iya bedau bisi ruang bilik penaik kediri empu. Iya beridup agi begulai sejalai ba ruang bilik apai indai iya tauka ngelampung menyadi iya empu ke udah bisi bilik penaik kediri empu.
Seigi Panding	RM1.00	Enti suba adat basa seigi panding tau diletak ba urang ngembuan tikas pengidup baka ke bumai betaun nadai kala chukup asil nyentuk ke iya nyau nyanda ba urang bukai maya ke abis beras. Ba pengawa beridup bukai nadai tentu ngembuan pengelandik baka beranyam, bebingkai tauka ngambuh duku. Dalam dunya baru diatu, adat basa ba seigi panding tu agi bercheremin ke tikas pengidup.
Tiga Jabir/Alas Muda	RM1.50	Enti kelia tikas pengidup urang tu bisi pengelebih agi ari baka udah belaki bebini, udah ngentak ruang bilik diri empu sereta iya mujur dalam pengawa bumai betaun lalu bisi asil ke chukup diempa sida sebilik. Kelimpah ari nya, ngembuan pengelandik jari ngaga perengka dikena beridup baka nganyam bebingkai, ngambuh duku, nempa beliung ngaga peredah. Dalam dunya baru tu, enti ngembuan penatai pemisi ti ulih nupi diri sebilik, bisi bebeli ke rumah enggau entukar sereta ngembuan tikas pemandai sekula tinggi ulih mai adat basa jabir tiga.
Alas	RM2.00	Enti kelia urang ke mai adat basa tu urang ke udah bedengah nyentuk ke iya suah diambi urang ngirup jalung. Lalu pia mega ngembuan penemu ba pengawa asal kitai Iban baka lemambang tauka urang selalu diinjau ba atur pengawa gawai besai baka Gawai Mangkung Tiang tauka Gawai Burung. Lalu pia, tikas pengidup iya tu urang bisi nyentuk ke iya ulih alai urang ke suntuk sendat tu tadi nyanda padi minta beras. Pulai ngagai dunya baru diatu, konsep dengah tu tadi ulih disebut kitai ba pemendar urang nya ngulih ke pengeraja enggau nyengula ke bala anak iya ngambi ke bisi nampung bilik sida iya dudi hari ila. Lalu pia mega ngeletak urang mai seigi alas tu enti urang nya udah dipadu ke nyadi tuai raban bansa pengabis iya nyadi tuai rumah. Lalu pia mega enti iya udah nyadi bujang berani nyadi soldadu tauka polis. Ba tikas pengidup, iya endang ngembuan pemisi ke ditemu urang rita sereta bisi ditinggal ke iya ngagai peturun iya ke agi idup. Lalu pia mega ruang bilik ke ditinggal ke iya tu tadi bisi ditampung peturun iya ke ngembuan tikas pengidup ti menyana
Alas Ngerang	RM2.50	Enti dulu menya, urang ke ulih mai adat alas ngerang enti urang tu udah bisi dengah ti ngujung ,ke iya selalu diinjau urang ngirup jalung maya Gawai Antu. Lalu batang pengidup iya pan meruan sereta bisi didinga berita ngembuan pengeraja ti ditemu urang kulu kili. Urang ka mai adat tu pengidup iya lebih agi pengidup iya ari urang ke mai adat seigi alas. Tikas urang ka mai alas pengabis iya tuai rumah enggau tuai raban bansa. Enti nyema tuai raban bansa tu tadi bisi pengelebih bukai baka bisi pengeraja ke ditemu urang kulu kili, selalu dikangau urang nembu ke pengawa maya bisi gawai besai tauka iya bisi udah mujur nganjung bala anak iya besekula tinggi nyentuk ke bisi nampung ruang bilik ke ditinggal ke iya, niang tu tadi ulih diletak adat basa mai alas ngerang. Kelimpah ari nya, urang periman ke ulih mai alas ngerang tu tadi suah agi bala sida ke bisi ngembuan pengawa dagang kediri empu ti ngujung ke iya tu beberita ketegal pengeraja ke ulih iya ari pengawa dagang. Lalu pia mega, ari pengawa bedagang tu tadi iya lalu ulih nganjung bala anak iya mujur besekula tinggi sereta bala anak iya bisi ngembuan pengawa enggau pangkat ke ulih nyadi pengering nampung ruang bilik. Udahnya urang periman ke ngembuan pemandai sekula lalu ngujung ke iya mangku pengawa besai bepangkat ti ngujung ke ruang pengidup iya mujur enggau beberita agi ka nyadi diletak adat mai alas ngerang.
Rusa	RM8.00	Nyau ngagai tikas adat basa mai rusa tu tadi kira ke adat basa ke besai ngeluas ari alas. Enti menya, urang ke diletak adat basa tu selalu iya tuai kayau ti matak ngayau mulau, tuai kayau tu endang mayuh dengah nyentuk ke berita iya nyulut kulu kili. Lalu pia mega ruang bilik iya endang ngembuan pengeraja ke ditemu urang mayuh. Kelimpah ari iya ke nyadi tuai kayau ti mayuh bedengah, iya kira ke nyadi tuai sida di rumah panjai tauka tuai raban bansa ba siti-siti menua. Ari nya tadi, iya selalu diinjau urang nembu ke pengawa maya bisi gawai besai baka ke ngirup jalung lebuh Gawai Antu tauka mai kenyalang (kayu ke diukir baka kenyalang) maya bisi urang nuduk ke Gawai Kenyalang. Lalu pia mega, enti tuai raban bansa tu tu tadi bisi udah bulih menua ari ke pengawa ngayau mulau tauka iya tu tadi ngempung menua, iya ulih diletak ngena adat mai rusa. Nyau rebak baru diatu, urang ke ulih diletak mai adat rusa tu enti baka iya bisi udah dichiri ke nyadi tuai raban bansa baka pangkat Penghulu, Pemancha enggau Temenggong ke bisi daya pengidup ke menyana sereta bisi peturun ulih nampung ngempung ruang bilik iya, udah mangku pengawa ke besai baka dipilih nyadi pengari rayat, bisi udah nerima bintang puji ari Gabenor tauka Raja berindik ari pengawa iya ke meri besai reti ngagai rayat enggau menua, bala soldadu enggau polis ti ngembuan pangkat besai sereta selalu didinga berita ngembuan tikas pengawa ti beguna ngagai mensia mayuh tauka nyaga menua enggau urang ke bisi negmbuan dagang besai ke udah ditemu rita sekayu dunya ti ngujung ke iya diberi Gabenor tauka Raja bintang puji ari pengawa dagang iya ti besai sereta nyulut.
Menaga	RM16.00	Tu kira tikas adat basa ke besai ti kala disebut ba menua Layar Ulu. Naka kenang tu ditulis, nadai udah urang mai adat Menaga ba menua Layar Ulu. Pemegai tampuk adat ngeletak ke urang ke mai adat tu enti iya tu urang ti dipebasa ke mensia mayuh, tuai raban bansa baka ke bepangkat Temenggong tauka udah mangku pengawa dipilih nyadi Pengari Rayat. Lalu pia mega, sungkak pengidup iya tu endang urang bisi tauka ngembuan pengeraja ti ditemu urang kulu kili.
Meningka	RM32.00	Ba pelilih menua Layar Ulu, nadai udah disebut tikas pengidup urang ke ulih mai adat basa tu. Tang ambi ke banding, pengawa urang ke ulih mai adat meningka tu endang segi lebih ari urang ke adat basa menaga.

Pengujung Kenang

Nyadi ba pengujung randau kami duai Tr. Bantan Anak Jerman, iya madah ke adat tu tu enda tau dimati ke kitai ngena adat aki ini tauka urang ke udah dulu. Kebuah pia, adat basa tu diletak nitih ke gaya pengidup ba tubuh diri empu. Ambi ke banding, enti indai iya ninggal enda tau diberi adat ari bechuan ke pengidup bala anak uchu iya empu laban adat basa tu diletak ari merening gaya tikas pengidup indai iya empu. Adat tu nadai tau diletak kelalu besai laban munyi ke udah dikenang kitai dulu ari tu tadi iya nya ngachau pengidup peturun iya ke agi idup baruh hari tu. Enti iya enda patut mai tikas adat ke diletak, iya deka narit ruang pengidup bala iya ke dudi. Lalu pia mega, adat enda tau diletak kelalu mit ari tikas pengidup iya enggai ke nyadi penanggul maya ka ngeletak adat ngagai bala iya ke dudi. Karang tu ditulis laban ngambi ke utai tu sama dikingat ke kitai rebak baru diatu kelebih agi ba pengawa adat bansa kitai Iban awak ke iya enda lenyau dibai serak ke dulu ti udah lesi midang. Enti iya ditulis, sejeman meh kitai ulih meda lalu ngingat ke iya. Taja taun beganti taun ti ngujung ke jeman beganti jeman, adat kitai, asal kitai enggau bansa kitai endang nyadi nyadi tanggung pengawa kitai empu meh ngenan ke iya. Terima kasih.