Dikarang: Nicholas J. Ugik (BA Soc. Sce, UMS)
Pemuka Jaku
Menua Sarawak dalam kandang taun 1400 udah diperintah Sultan Brunei. Menua Brunei sebuah mengeri ti mansang ngemeranka pengawa dagang entara menua ari penuduk iya ti alai kapal sangkai ari menua luar kelebih agi pengudah perintah Sultan Melaka labuh dalam taun 1511 ketegal dialah ke Portugis. Ari nya tadi pengkalan dagang ba endur bukai pan lalu angkat ketegal bala dagang ti enda setuju ke chara perintah Portugis di Melaka. Portugis ngeletak pupu ti kelalu mar enggau dagang rempah dalam pelilih menua Nusantara semina ulih dipegai perintah Portugis aja. Belabuh ari nya tadi, Brunei lalu majak angkat nyadi siti kuasa dagang ti balat nyulut maya nya suba. Pemesai bungkur perintah Brunei ngerampit Pantai Barat menua Sabah enggau Sarawak (rampa menua Bau nyentuk ke Kuching) sereta genturung pendiau ba tebing tasik baka Kuala Batang Rajang, Kuala Saribas enggau Kuala Batang Lupar.
Dalam taun 1830, Sultan Omar Ali Saifudin nganjung Pangeran Muda Hashim berunding enggau Pengiran Indera Mahkota ti nyadi Gabenor Sarawak iya nya siti pangku pengawa ti nyadi pengari perintah Sultan Brunei di menua Sarawak. Kebuah Sultan nganjung Pangeran Muda Hashim ketegal ari Gabenor Sarawak ti balat nekan bala rayat ngena ukum berat enggau pupu padi ti bangat besai. Jeman nya menua Sarawak balat amat siga laban bala pemesai raban bansa menua Sarawak ngelaban Pengiran Indera Mahkota. Siku ketuai raban bansa ti nyulut rita iya nya Datu Patinggi Ali ti balat enda setuju enggau atur Gabenor Sarawak. Pengiran Muda Hashim enda ulih nagang Pengiran Indera Mahkota ari ti bejalaika perintah iya ti balat nekan rayat lalu penyarut menua Sarawak jeman nya majak balat.
Nyadi kena bejuraika kenang dalam jerita lama (history, sejarah), kapal dagang bansa ribai ari menua Great Britain karam ba Batang Sarawak dalam kandang taun 1838 ketegal dilanggar bala Dayak ti nginau ba nanga sungai ngiga pengeraja kapal dagang ti mansa maya nya. Pemansik jerita lama (historian) menua ribai ngela bala kayau tu perumpak tauka lanun (tribes) . Maya nya Pengiran Muda Hashim nulung bala ribai ti dituntung penusah tu tadi. Ninga berita tu tadi, perintah British Crown Colony ba Singapore madu ke James Brooke betemu enggau Pengiran Muda Hashim laban iya udah nulung bala dagang ribai ba penusah kena kayau bala Dayak. Meda bisi jalai bakanya, Pengiran Muda Hashim minta tulung ari James Brooke munas ke penyarut ti balat ngerekai ba menua Sarawak.
James Brooke siku ari soldadu Kompeni Hindia Timur British (East Indies Company Co.) . Pengudah iya ke ngetu gawa nyadi soldadu, iya meli kapal pelayar ti benama Royalist iya ke bisi ngembuan rengka kena beperang ketegal iya ti rindu belayar di serata dunya tu. Nyau kepuas iya ke bejalai, entara taun 1830-an iya ngenduh enda lama di menua Singapore. Penyarut ti balat nyadi di menua Sarawak jeman nya suba lalu ngerampit ngagai bala anak kapal menua Britain ti kena terumpak bala kayau Dayak.
Pengiran Muda Hashim nulis surat minta sah ari James Brooke pengudah seduai beambu diri sekaban maya James Brooke ke datai betemu enggau iya di Kuching. Dalam taun 1839, James Brooke enggau kapal Royalist datai mantu Pengiran Muda Hashim mutar ke penyarut di menua Sarawak. Ari kereban senyata perang ti chukup, James Brooke mujur munas ke penyarut ngelaban perintah Sultan Brunei.
Pengudah ari tu tadi, Sultan Brunei madu ke James Brooke nyadi Gabenor Sarawak nganti penuduk Pengiran Indera Mahkota kena 24 haribulan Sembilan 1840. James Brooke megai menua Sarawak (mungkur ari Sungai Sarawak nyentuk ka pelilih Bau) nyadi pengari perintah Sultan Brunei.
Pengiran Muda Hashim pan pulai baru ke Brunei tang maya nya tadi, penuduk iya nyadi Pengiran Bendahara udah diganti Pengiran Yusuf. Bepun ari penanggul tu tadi, dia deh istana Brunei lalu charut beperang ketegal seduai tu tadi. Pengiran Muda Hashim menang lalu iya nyadi Pengiran Bendahara Brunei sereta nyadi waris sultan. Anak Sultan Omar Ali Saifudin, Pengiran Temenggung Pengiran Anak Hashim ke nyadang diri waris sultan berengkah pedis ati meda ulah aki iya Pengiran Muda Hashim ngelar diri waris sultan. Dalam taun 1846, Pengiran Muda Hashim pan dibunuh ngena atur ti diputus ke Pengiran Temenggung Anak empu.
Berita pemati Pengiran Muda Hashim ditemu James Brooke lalu iya balat ngeransi laban Hashim kaban ti diambu iya empu. James Brooke lalu minta bantu ari Crown Colony British ba Singapore laban ka nyerang Brunei. James Brooke ulih ngalahka Brunei kena bulan Tujuh 1846. Lalu dalam bulan Dua belas 1846, sempekat baru enggau Brunei madahka James Brooke tu Rajah menua Sarawak (mungkur Tanjung Datu nyentuk ka Batang Sadong) lalu Brunei nadai kuasa ba Sarawak bepun ari nya tang semina Rajah James Brooke semina mayar pampas taun. Kelimpah ari nya mega, Pulau Labuan labuh ngagai jari Crown Colony British lalu James Brooke dipaduka nyadi Gabenor Labuan.
Sarawak diperintah Rajah Brooke
Rajah James Brooke bepun nyadi Rajah menua Sarawak ari taun 1846 pengudah iya ngaga sempekat enggau Sultan Omar Ali Saifudin. Iya lalu nuduk ke Astana endur iya bejalai ke perintah iya ba mua ke kanan Batang Sarawak. Sekumbang ke udah nyadi Rajah, iya majak ngerekai ke perintah iya besai sebesai lalu mayuh endur di menua Sarawak di ambi iya ari pegai Sultan Brunei. Perintah Rajah James Brooke ngerekai ari Batang Sadong nyentuk ka Tanjung Kidurong di Bintulu. Iya berengkah negap ka atur perintah iya dibantu Kunsil Nengeri ke dipegai bala tuai raban bansa menua Sarawak. Rajah lalu magi setiap sitak menua Sarawak nyadi bahagian ti dipegai Tuan Residen. Upis perintah tauka kubu digaga ka endur Tuan Residen bejalai ke pengawa enggau endur bebayar ke pupu. Kubu tu sempama upis ke bekuta laban dipagar enggau tebelian sereta bisi bedil enggau dijaga soldadu. Ba senentang ekonomi, iya mai bala penatai ari menua China ngemansang ke lumbung emas ba Bau enggau ngemeranka pengawa bekebun bedandang besai.
Pengudah Rajah James Brooke ngasai ka diri mansang tuai sereta ribat laban pemedis, iya nyiri ke anak menyadi iya Charles Johnson Brooke ti nyadi Rajah Muda nganti penuduk iya nyadi Rajah ba taun 1868. James Brooke pulai ke menua England lalu mati sakit tuai maya umur 65 taun.
Rajah Charles Brooke enggau Kingdom of Sarawak (1868-1917)
Charles Brooke siku ari Rajah ti mayuh peneleba dalam perintah Rajah James Brooke laban iya kala nyadi Tuan Residen Lundu dalam taun 1852. Pia mega, iya endang ari mula udah dichiri ke Rajah James Brooke nyadi Rajah Muda lalu suah nganti aya iya James Brooke nyadi Rajah lebuh maya Rajah pulai ke England ketegal mutar ke penanggul politik enggau parlimen Great Britain ba senentang iya madu ke diri nyadi Rajah Sarawak enggau atur iya munas ke penyarut kayau di Sarawak. Charles Johnson Brooke kala nyadi Tuan Muda enggau Rajah Muda kelimpah ari Residen. Maya perintah Rajah Charles Brooke, iya ngerekai ke menua Sarawak besai agi nyentukka pelilih Baram dalam taun 1881 enggau Lawas dalam taun 1905 ti nyadi baka Sarawak ti kemaya hari tu.
Charles Brooke lebih berat ke pemansang Sarawak ari Rajah James ke semina ngira penguntung ari asil ekonomi menua Sarawak. Nya alai Rajah Charles meda ari gaya politik, ekonomi enggau ubah pendiau kena iya ngangkat ke perintah menua Sarawak baruh jari iya empu. Ba senentang politik, Rajah Charles numbuh ke Kunsil Nengeri bejalai ke perintah iya lalu bala pengawa tuai raban bansa ti dibuai maya pegai Pengiran Indera Mahkota baka Datu Patinggi, Datu Temenggung, Datu Bandar enggau Datu Imam dikena Rajah Charles baru. Rajah Charles Brooke chukup chakah dalam polisi iya ba senentang ngayau laban iya deka nyaga pengelikun menua Sarawak. Iya ngaga siti Ukum Adat (Law Code) kena iya munas ke pengawa ngayau tu. Ba senentang tu meh bala tuai Dayak balat enda setuju ke atur Rajah Charles Brooke kelimpah ari ke enggai mayar pupu ngagai perintah.
Ba senentang pemansang dalam pengawa ekonomi, Rajah Charles Brooke megai polisi mai bala penatai ari menua China enggau lebih mayuh agi ketegal iya deka ngemansangka pengawa lumbung emas enggau dagang di menua Sarawak. Lalu pia mega, jalai raya lalu berengkah digaga ti ba pelilih menua Kuching dikena iya ngemansang ke tikas ekonomi enggau pendiau rayat. Pengudah minyak ke bisi ditemu ba menua Miri dalam pun taun 1900, Borneo Company ke bisi bekait enggau Rajah Charles Brooke besempekat enggau Shell Company ngemansang ke dagang minyak enggau gas di menua Sarawak.
Ba senentang pemansang ba sosial tauka tikas pendiau, Rajah endang udah ari pun deka ngemunas ke pengawa ngayau entara raban bansa di menua Sarawak. Rajah Charles Brooke meda penyarut tu nagang ekonomi Sarawak ngerembai laban nadai urang dagang deka bejalai ke pengawa dagang di Sarawak ketegal menua siga. Kelimpah ari nya tadi, sekula mission St. Joseph mega digaga di Kuching ti ngemeran ke Pelajar English. Pengarap Kristian mansang ngerembai maya pegai Rajah Brooke Kedua ketegal ngemeran ke tuai gerija mai ajar sida ngagai genap endur menua Sarawak kelebih agi baka Anglican, Sidang Injil Borneo enggau Katolik. Jeman tu mega Rajah ngemeran ke bala Iban ari bagi kedua pindah ke endur baru baka Batang Rajang enggau Jelalong laban ka ngemansang ke pengawa bekebun bedandang besai baka gambir enggau getah. Dia deh kitai meda Penghulu Ulin ari Spak udah narit bala pindah muka menua baru ba pelilih Jelalong enggau Sangan iya nya endur pelilih Bintulu diatu.
Iban enggau Rajah Brooke
Dalam jerita lama (history) Rajah bansa ribai ari peturun Brooke ke megai menua Sarawak, ketebal agi cherita balat agi nyebut Rajah Charles Brooke ari maya perintah iya ti lama lebih kurang 50 taun enggau atur perintah iya ti dipeda ngemansang ke Sarawak lebih nyulut agi. Ari sistem perintah ke dikena Rajah Charles Brooke tu meh mayuh nyadi ke chuan perintah Menua Sarawak ke kemaya hari tu. Ketegal ari chara perintah iya ti ngemeran ke pemaik entara raban bansa di Sarawak ti nagang pengawa ngayau enggau sistem pupu ti dipeda tuai raban bansa kelebih agi bansa Iban chara baru ti jauh bebida enggau jalai pengidup sida ke udah sejeman.
Kenang kitai ngagai ketuai raban bansa kitai Dayak ke balat ngelaban perintah Rajah James Brooke maya iya nyadi Gabenor Menua Sarawak lalu dipadu ke Sultan Brunei nyadi Rajah. Ari taun 1843 udah bisi kayau entara Dayak enggau Rajah. Maya nya, Bujang Berani ari Nanga Padeh Pemancha Dana Bayang betempuh enggau bala Rajah. Kelimpah ari nya, Rajah nyerang Linggir Mali Lebu ba Kerangan Pinggai laban mai iya taluk ke perintah. Udah nya Rajah lalu mudik Batang Rimbas betempuh enggau Rekaya Antau Linggang Neneri enggau Rekaya Gun Mangku Bumi. Semua tuai tu tadi alah magang lalu sida dibai Rajah James Brooke ngaga sempekat bebaik ngambi ke nadai penyarut agi. Semua sida nyerah tang enda setuju enggau perintah Rajah.
Dia meh kitai bisi meda tuai kitai Iban ke benama Libau Anak Ningkan tauka gelar iya Rentap Tanah, Runtuh Menua ari menua Skrang balat belaban enggau perintah Rajah ari iya ke enda taluk ke perintah. Rentap tu pun iya enggau pengawa bekayau tu ari iya ke nyadi manuk sabung Orang Kaya Pemancha Dana Bayang ari Padeh. Pemancha Dana Bayang mayuh matak kayau besai nujah menua Batang Kapuas enggau menua pegai Sultan Sambas. Nyadi sekali, Rentap ke nyadi manuk sabung ngulu ke kayau ngagai menua Sambas ba Pontianak ke kena taluk perintah Belanda. Dia deh Rentap tu besatup enggau anak menyadi Sultan Sambas lalu iya bulih dengah laban munuh anak menyadi Sultan Sambas. Rentap mega ngerampas keris emas munsuh iya tu tadi sereta bulih bedil Sultan Sambas ti digaga perintah Belanda ti digelar iya ‘Bujang Timpang Berang’.
Dalam taun 1844, bala Rajah ti betuai ke Capten Steward enggau Datu Patinggi Ali nyerang kuta Rentap ba Kerangan Peris tang sida alah jamah bala Rentap. Udah nya Rentap bebalas enggau Rajah James Brooke ari ketegal Rajah nuduk ke Kubu James ba Nanga Skrang ba taun 1850. Rentap nyerang kubu tu laban iya meda chara Rajah tu nekat jalai sida mindah ke tasik enggau perintah ngumpul pupu ari bala Iban. Ba perang tu, Komander Allan Lee nyadi dengah menantu Rentap ke benama Layang. Laya Rentap enggau Rajah Brooke nyerarai nyentuk kuta Rentap ba Bukit Sadok dialah ke bala Rajah dalam kandang taun 1861.
Ketebal agi kayau ke dibatak Rajah Brooke tu diulu ke Rajah Muda Charles Johnson Brooke kelebih agi penyarut entara perintah enggau Rentap. Charles Brooke ke agi mangku pengawa Rajah Muda belajar ari peneleba iya ngulu ke kayau belaban enggau tuai raban bansa ke enda taluk ke perintah. Iya mega bisi peneleba dalam ngatur diplomasi tauka aum ngemadu ke penyarut baka aum Rajah enggau Rentap dalam taun 1853 laban ka bebaik.
Pengudah Taun 1870: Berita ari Batang Ai
Pengudah Rentap alah ba Bukit Sadok dalam taun 1861 lalu iya pindah melunggang ngalih ke Entabai lalu ngenduh beridup ba Karangan Panggil, Ulu Wak, Julau nyentuk ke seput iya padam dalam taun 1870. Rajah Charles Brooke nyadi Rajah Sarawak kedua nganti aya iya Rajah James Brooke dalam 1868 mai menua Sarawak nuju pemaik laban penyarut enggau pengawa ngayau ulih mupuk lengis. Jerita Rentap enggau perang Bukit Sadok udah ulih diputarka Rajah Charles Brooke laban nadai pengawa bebalas. Tambah mega uchu Rentap ke benama Subang disabung Rajah Charles Brooke jadi enggau Penghulu Dalam Munan, siku tuai Iban ke udah taluk ke perintah Rajah.
Dalam taun 1868 maya perintah iya, menua bagi kesatu iya nya Kuching nyentuk ke Batang Sadong endang udah lama taluk ke perintah Rajah ari Iban Balau enggau Iban Sebuyau bekering ke perintah Rajah ketegal sida balat dikayau bala Iban ari bagi kedua kelebih agi ari Saribas enggau Paku. Bala Iban Sebuyau enggau Balau tu meh nyadi soldadu Rajah Brooke ke dibai iya matak kayau munas ke penyarut ba menua Sarawak. Ba menua bagi kedua, bala Iban ari Saribas, Paku enggau Rimbas udah taluk ke perintah Rajah semina bala Iban ke dipegai Penghulu Ngumbang, Penghulu Imba, Penghulu Bantin enggau Penghulu Allam ari Batang Ai aja apin taluk ke perintah Rajah.
Dalam jerita ngenang Iban ari Batang Ai tu, mayuh agi ngenang jerita Penghulu Bantin beduduk ari iya balat besatup enggau bala Rajah Brooke. Bantin ti digela Ijau Lelayang tu manuk sabung Penghulu Ngumbang ti digela Berauh Langit. Taja pia, nama agi balat amat nyulut lebih ari Penghulu Ngumbang dalam kenang jerita lama Sarawak. Nyadi penyarut enggau Rajah Charles Brooke bisi besangkut enggau kayau Bantin, Kana, Allam enggau Imba ti enda ngasi ke perintah Rajah ti nangkan bala Iban ngetu dalam pengawa kayau. Nya alai dalam taun 1886, Rajah empu matak kayau ninggang Penghulu Ngumbang ba Genting Kedang, Batang Ai. Rajah madu ke Orang Kaya Pemancha (OKP) Nanang ari Padeh nyadi tuai serang ba kayau serak tu. Kelimpah ari nya, Penghulu Minggat ari Awik, Saratok enggau Penghulu Jabu ari Bangat, Skrang sama enggau dalam kayau Genting Kedang. Dalam kayau tu, Penghulu Ngumbang ‘Berauh Langit’ alah sereta setuju bebaik enggau perintah.
Penyarut lepa enda lama nyentuk ke taun 1894 beduduk ari Penghulu Bantin ti charut penemu enggau Tuan Residen Simanggang iya nya Bailey. Tu ketegal Bantin enggai mayar pupu tajau ti dibeli iya ari menua Ulu Ai, Kapuas. Enda liat enggau ulah Bantin, Bailey matak kayau nuju Bantin ba Batang Ai. Rajah empu enda nemu penyarut tu bisi nyadi nyentuk ke kayau Bailey ba Bukit Entimau ti ngujung ke Penghulu Bantin nyurut kediri. Taja pia, Bantin tetap enda nunduk ke perintah. Nya alai, sekali agi Bantin matak kayau ngelaban perintah dalam taun 1897. Pengudah nya iya ngentap ba Ulu Engkari.
Kayau Lus (Cholera Expedition)
Penyarut tuai Iban ari Batang Ai enggau Rajah Charles Brooke agi nyerarai baka api. Rajah enda diau diri enti tuai Iban ti balat kih tu enda dipunas ke iya laban sida tu agi mai penyarut ngagai menua. Rajah Brooke lalu berunding deka matak kayau besai ngelaban Penghulu Ngumbang enggau Bantin dalam tuju ati iya deka ngemunas ke penyarut. Kenang ba senentang tu tau diperatika kitai bala mayuh ari penungkah iya ke naban ke beribu nyawa anak mensia baka kitai berati ke kayau Rajah ninggang Rentap ba Skrang nyentuk ke Sadok. Aku ti nyeruri jerita lama tu agi mabu amat begiga ke penemu tauka resources ba senentang kayau Rajah ngelaban tuai Iban Bantin enggau Ngumbang. Nyadi kayau tu dikumbai kitai ‘Kayau Lus’ tauka digela pengarang jerita lama bansa ribai ‘Cholera Expedition’. Kebuah digela munyi tu laban beribu nyawa mensia mati ketegal penyakit cholera tauka muang ai lebuh kayau tu nyadi.
Dalam taun 1902, Rajah enda betangguh agi ka matak serang. Dia deh iya madu ke Penghulu Dalam Munan ari Sibu, Penghulu Insol ari Padeh enggau Penghulu Banta ari Skrang nempuh sida Penghulu Ngumbang ba Batang Ai. Sida ke bukai ke sama nyerumba kayau tu tadi Rekaya Nyanggau ari Awik, Dampa Apai Dungkong enggau Tarang Apai Daong ari Paku. Nyadi bala Munan ketebal agi Iban Nanga Batang Rajang enggau Kanowit mupuk ngulu Katibas lalu rembus ba Ulu Engkari. Sida Banta enggau Insol pan sama merau ari Rantau Anak (Betong diatu) nasik lalu tama ngagai Batang Ai.
Kenu ko jerita bala tuai kitai Iban ke bisi pansik ba senentang kayau tu, Penghulu Bantin bisi bulih kenyap betemu enggau Lulong seduai iya Kumang. Dalam mimpi tu Kumang enggau Lulong madah ke Rajah deka ngelanggar menua sida ba Delok. Tang seduai iya mesan Penghulu Bantin enda ibuh irau laban urang Panggau Libau bisi ngemata ke sida ke di baruh hari ditu. Dia deh Bantin meda bangkai nabau besai amat melintang ai Engkari. Kumang madah ngagai Bantin ngasuh iya nangkan bala nembiak iya anang mandi sereta ngirup ari ili bangkai nabau nya tadi.
Mulai ke kenang ngagai kitai ke di baruh hari ditu, nyadi bala Penghulu Insol enggau Penghulu Banta ke ngulu Batang Ai kena tinggang penusah penyakit muang ai (cholera) ketegal sumpah urang Panggau Libau. Bala sida sempat ga betempuh enggau Penghulu Allam sereta Kana anak Penghulu Munau ti diulu ke Penghulu Bantin. Mayuh agi bala sida ari Saribas tu tadi mati ketegal penyakit muang ai tu baka Rekaya Nyanggau ari Awik, Saratok. Sida ke agi dapat mayuh agi ke mati maya ke belaban enggau Bala Bantin. Nyadi bala Penghulu Dalam Munan ke ngili Batang Engkari mantu sida ke ari Saribas enggau Skrang tu tadi. Tang bala Bantin enda ulih dialah ke sida. Ribu nyawa anak mensia mati dalam kayau serak tu. Kayau Rajah serak tu puntan lalu Bala sida ari Saribas, Skrang enggau Kanowit pulai nuju menua diri.
Pengudah Kayau Lus 1902 tu puntan, penyarut bisi ngetu enda lama entara Iban Batang Ai enggau Rajah. Kitai semua pan sama nemu Rajah enda diau diri nyentuk ke tuai Iban ti enda sepenemu enggau iya alah tauka dibunuh. Dalam taun 1904, Rajah sekali agi matak kayau ninggang bala Bantin ba Batang Ai ketegal ari Penghulu Allam enggau Kana nyerang bala Penghulu Dalam Munan ba Wong Sadai, Kanowit. Kayau seduai tu mayuh agi disebut bala penyeruri jerita lama ‘Kayau Bongkap’ iya nya perau kayau Penghulu Allam ti dikemudi ke Mantok Apai Chelling tu digela Bongkap. Dalam kayau lus serak kedua tu, Penghulu Bantin sekali agi bemimpi betemu enggau Kumang. Kumang madah ke iya sida ari Panggau enda ulih agi ngemata ke sida laban enda ulih ngalah ke bansa ribai ari menua mata panas padam. Enti nyema sida Bantin agi ka ngelaban, nya tepanggai ba sida. Nya alai dalam taun 1904 tu, bala Rajah mudik Batang Ai lalu ngalah ke bala Iban ti enda setanah enggau iya. Bantin pan nyurut ke diri lalu mai bala iya ngenduh ba entara menua Batang Kapuas, Kalimantan ngalih ari menua pegai perintah Belanda. Sepengudah kayau tu, Batang Ai udah taluk ke perintah Rajah Brooke.
Taja pia, Penghulu Bantin empu endang sigi kih lalu enda nunduk ke Rajah. Nyadi sekali dalam taun 1906, iya bisi nemuai ke Simanggang ketegal ari iya meli Tajau ba Ulu Ai, Kalimantan. Dia deh iya sekali agi charut enggau perintah ketegal enggai mayar pupu. Penghulu Bantin sekali agi matak kayau ngelaban Rajah lalu diserumba Penghulu Allam enggau Kana betempuh enggau bala Rajah ba Bukit Malong. Penghulu Bantin alah dalam kayau tu. Dalam taun 1907, Rajah Charles Brooke mai Bantin bebaik sereta ngemadu ke pengawa ngayau. Penghulu Bantin, Penghulu Ngumbang enggau Penghulu Dalam Munan sereta Rajah Charles Brooke empu baum pasal pengawa bebaik tu ba Kapit taun 1907. Pemaik enggau pengelikun menua ngerembai nyentuk ke Penghulu Ngumbang enggau Penghulu Dalam Munan empu madam ke seput dalam taun 1914 lalu ditangkan ke Rajah Brooke dalam taun 1917. Menua Sarawak udah bisi jalai iya empu ba pemendar Rajah Charles Brooke nyerakup ke pemaik enggau pemansang ekonomi. Perintah Rajah Sarawak diganti anak iya, Rajah Charles Vyner Brooke ti dichiri ke ke nyadi Rajah dalam taun 1917.
Nyimpul ke Kenang
Penyarut Iban enggau perintah udah ulih diatur Rajah Charles Brooke lalu bala Dayak kira ke udah nitih ke atur iya. Taja pia, tuai kitai bansa sereta enggau bala nembiak iya ke udah balat tinggang penusah enggau pemati beduduk ari sagam ati ti deka ngenan ke menua, adat enggau jalai pengidup. Jaku ke engkeman agi, tuai kitai Iban ti kih bakatu ketegal ari sida ti enggai diperintah bansa bukai ti bebida jalai pengidup. Kitai Dayak rebak baru diatu patut berati ke jerita aki ini kitai tu. Amat meh sida udah lesi nangga hari, parai nangga lemai tang kitai endang patut belajar ari pengawa sida ti salah ngambi ke enda ngulang penyalah nya agi. Iya betul ambi meh nyadi chuan enggau teladan. Penulis (aku empu) minta ampun enti utai ke diseruri aku tu bisi salah tela, salah pelaba. Aku mai kitai mayuh ke bisi macha jerita tu ngambi ke sama nambah penemu ti patut dikunsi entara kitai. Nya aja, terima kasih.
