Artikel asal: The Iban Dilemma
Dikarang: Vernon Aji Kedit
Dikalih dalam jaku Iban: Nicholas J. Ugik
Nama kebuah bansa Iban siti ari raban bansa ti pemadu mayuh tauka majoriti ba menua Sarawak muntang amat diserara, dibagi enggau diperintah? Saut tu tau diperati ke kitai ba gaya pendiau enggau runding bansa Iban empu.
Ari penyampau tubuh bansa Iban ke majoriti endang patut nyadi ulu tauka tuai megai perintah menua Sarawak. Tu ukai penemu politik deka menyati bansa bukai tauka kelalu bekering ke bansa diri empu laban ulih dipeda ngena chura penemu kira-kira matematik enggau statistik. Ari nya tadi, bansa Iban ulih dipeda kitai ba genap buah parti politik ti bisi di Sarawak; dikumbai penemu pechah enggau perintah.
Chunto ke semak agi Iban kala udah beserakup baruh Parti Nasional Sarawak (SNAP), udah nya baruh Parti Bansa Dayak Sarawak (PBDS). Pengudah ari tu tadi, runding enggau pengawa ti nyerakup ke Iban tu puntan tajapan chukup mujur ba pun pengawa bediri ke parti bansa Iban. Nama kebuah? Sekali agi tau dipadah ke ba gaya runding enggau pemai ati diri empu.
Baka ke dipeda ba bansa Iban empu, aku (penulis asal: Vernon kedit) bejaku terus-terang, enda belalai enggau enda takut tauka manis didinga. Aku (penulis) madah beterus terang enda betatak tajapan enda semua Iban besetuju ba senentang penemu tu. Enda ngawa laban nya bepanggai ba pemutus diri empu. Kitai ulih besetuju tauka enda tang kitai enda ulih nyeliah ke pekara ti betul.
Penanggul ti balat nekul kitai bansa iya nya ubah runding. Ari runding ke nyadi batang penanggul enggau pemuntan, nya meh nyadi kebuah bansa kitai tu muntang diserara. Aku (penulis) ulih nulis siti bup baka Dr. Mahathir Mohamad ke udah nulis “The Malay Dilemma”. Aku engka bisi digela sekeda urang ngelaban perintah, penyati bansa tauka bemunsuh enggau bansa bukai. Tauka engka balat agi aku (penulis) tau dijil dalam rumah pasung. Kapa enda nyadi enti udah agih iya bakanya. Tang pengujung iya, aku (penulis) bisi isi perut deka nusui pekara ti betul. Tang enti deka nulis siti bup deka beguna ke awak enggau jam ke lama endur tembu, pansik lalu dua bengkah pekara ke berega tu nadai ba kitai. Nyema kitai kelalu enda ibuh ke bansa diri, kitai ulih meda dini penuduk kitai diatu.
Nama penanggul dalam runding Iban?
1. Kepapas
Bansa Iban tu endng udah asal iya ditemu urang balat amat mekuh runding kepapas. Endang udah ditanam dalam runding ari jeman kelia ba genap indu enggau lelaki disadang mujur enggau angkat lebih ari pangan diri, awak ke nyadi urang ti benama sereta bepangkat. Jaku sempama urang putih ngela runding bakatu “ Lebih manah agi ari Jones”. Kitai ba menua Malaysia ngela pekara tu “penemu gerama”; niki lalu ninggang pangan diri laban ka datai ba tuchong. Ba genap iti bilik dalam sebuah rumah panjai, endang seruran ka lebih agi ari pangan diri. Penemu kepapas tu bejalai dlam runding ngambi ke diri empu lebih tinggi enggau benama. Taja pia, penemu tu mechah ke bansa enti penemu tu kelalu ngira diri empu. Tu meh penanggul ba bansa Iban dalam tuju kitai nguji enggau naka ulih nyulut ari urang bukai, sekali ke kitai tu sanggup ngindik urang bukai ketegal ka niki datai ba tuchong tauka sama ngembing pangan diri lalu sama niki ke tuchong? Bisi penanggul ke ba senentang ari asal (menua dibagi nitih ke ai) penatai urang ke dipilih ketuai kitai? Patut tauka enda Iban ari genap bagi menua sama berebut madah ke ketuai menua diri patut dichiri ke nyadi ‘Tuai Besai’ (Paramount Chief)?
2. Penemu
Genap iku Iban endang ngembuan buah penemu diri empu, baik ke ngundan penemu ti manah tauka jai. Demokrasi tu bisi dua bagi pekara ti chukup besai reti iya nya; genap iku urang bisi ungkup ngembuan penemu diri empu lalu kedua patut bebasa ke penemu urang bukai taja enda besetuju enggau penemu nya. Ba senentang penanggul pendiau bansa Iban; bisi ke enda kitai bebasa ke penemu urang bukai tauka ngumbai penemu diri empu aja betul? Tu mai kitai berati ke penanggul nangkan ke tu iya nya “malu”.
3. Malu
Kitai Iban tu enti nyema bisi sekali udah kala salah tauka diaku ke salah, sanggup ke enda kitai nerima? Berapa iku kini Iban kala ngaku sereta nerima penyalah ke udh digaga sida? Tu mega siti penanggul ti tau ngasuh runding kitai bansa tusut. Kitai tau mega dikumbai siti ari raban bansa ke pedis amat ngampun ke penyalah. Kitai bansa mega suah betalat ke anak betemu nusut peturun aki ini kitai. Nuan engka bisi nemu pekara ke bendar ti ulih dipeda penulin enggau pengamat tang sekeda kitai Iban enda ulih diputar ke penemu agi enti nyema iya udah ngaga pemutus baik betul tauka salah. Sedunya pan nadai meh ulih ngubah penemu iya. Malu tu sebengkah ari pekara ti chukup berat dalam ubah pendiau bansa Iban. Pekara tu mai kitai ngagai penanggul nangkan ke udah tu.
4. Kering Penemu
Taja pan kitai nemu kitai amat salah, tang sekeda ari kitai pedis amat ka nerima pekara ti amat betul enti enda saum penemu. Iya ke balat agi, sekeda ari kitai bisi apin nemu nama penyalah diri tang lalu ngering ke penemu diri madah diri betul. Penanggul tu mega ngasuh runding kitai tusut nentu ke pemutus. Kering penemu tu ketegal ari runding ti silau, sempit enggau tebal laban pemalu sempama reti kitai nulak jalai pengidup ti baru tauka bisi ubah ari jalai idup iya ke udah. Kitai agi ngenat ke jalai pengidup ti lama lalu ngereja pengawa nadai insur ari ke udah. Kitai puntan meda kampung ke bepun ari sepun kayu. Kitai mega tinggal di belakang meda rampa menua tu enggau lebih besai agi lalu mayuh pekara bukai ke lebih manah agi. Kitai bansa Iban sempama ke agi lekat dalam lupak paya ketegal kitai enda berani deka nyemerai sungai ke lebih besai laban irau ke bisi baya. Kitai sanggup enda mindah laban naka anak runding ketegal nyaga pengelikun nyawa diri, nama utai ke ulih dipelajar ke kitai sereta ketegal kitai jampat amat nyamai enggau jalai pengidup ke lama. Nama kebuah? Penanggul tu mai kitai ngagai pekara ti kepenudi ti ngasuh runding Iban tusut.
5. Pandak runding
Aram meh kitai sama napi- Dalam jalai pengidup kitai, endang udah sejeman iya kelia, endang agi dikembuan sekeda ari kitai ari taun besilih taun. Ambi ke banding, kitai Iban megai runding baka bumai semina chukup ke empa setaun. Kitai bansa enda baka Cina ke landik amat nyimpan pemisi sereta ngerembai (puku dalam pengawa dagang) ke pemisi sida nyadi penabat dudi hari. Tang sekeda ari kitai bansa enda bakanya, kitai semina ngira pengidup ungkup ke sehari tu aja. Pengawa dagang tauka nyimpan kengka pemisi endang ukai ari jalai pengidup kitai bansa Iban. Sempama jaku udah alah laban kemarau panjai, nya baru kitai merinsa lapar ketegal pungkang pemakai. Pekara tu endang udah dipeda nyata nyentuk ke saritu. Penemu matematik ni ulih nipu kitai. Ketungkah ari tu, Iban mengkang nyadi raban bansa ke balat seranta dalam menua Sarawak.
Bepun ari kitai macha ba genteran keterubah, bisi tulis pesan pandak aku (penulis) engka muntang amat ditemu balat mayuh. Lebih nyentuk agi, penanggul tu engka pekara ke muntang tang mayuh ari kitai Iban ka lebih besai agi penemu ngambi ke pandai dipeda urang. Tu meh penanggul tusut runding sempama ke nyadi dinding entara.
Enti nyema kitai bisi pemerani ti ulih nerima asal penatai bansa Iban enggau pengurang bansa kitai empu, baru meh kitai ulih nyerungkai penanggul tusut runding tu. Tang bakani chara deh? Chara mutar ke penanggul tu enda muntang, tang ukai ga nyentuk enda ulih diputar. Semua utai tu bisi dalam diri kitai empu enti kitai berani nyeremin diri enggau ati ti chukup lurus.
Aku (penulis) udah bisi saut aku empu lalu engka nuan bisi saut nuan empu. Jalai mutar ke penanggul tu ukai penemu rama tang iya nitih ke tela penemu siku-siku urang. Aku meda diri ke bansa Iban, udah ngambi singkang aku keterubah nukar chara aku berunding. Tu ke dikumbai paradigm shift (mensia nukar chara berunding ke diatu ngagai siti tikas penemu ke manah agi). Kemaya alai nuan berubah deh?
Salah munyi jaku sempama, “mansang parai apai, surut parai indai”. Tang tau enda ibuh nyau baka jaku sempama tu.
