Ngangkatka Jaku Iban Ari Nguasa Pengawa Dagang

Dikarang: Nicholas J. Ugik, 31hb Sepuluh 2014.

Pemuka Jaku

Uji anang guai ragak kita ke biak puting setak niti ruai

Uji sama diau jenuh bala mayuh duduk berintai

Laban tubuh jara aku tu deka belicha nusui penanggul lama ngerekai

Enda salah meh sangka aku enti kitai deka sama nimang

Ngambika bala banyak sama nemu penusah udah sebubu ngundang

Dia meh kitai deka betalatka penemu nuju jalai pemansang

Tak nadai meh anak jaku aku tu tak semina munyi puput ribut lemai

Enda dengar-dengar munyi gi sida ke pandai licha bejuraika penemu ribai

Nyadi penemu mimit aku tu tak semadika bisi dikena kitai sebuat betimpai

Ngichaka ke ulih dipetalatka bala tuan maya baum gempuru besai

Tak begenggam jari meh tudah aku mai penemu naka pemabu

Tak nadai meh kengka runding laban enda chukup ai basu

Agi enda badas dipeda baka bemban ke enda chukup linsu                                  

Jaku bungah ko sida di Layar, jaku tundi ko sida di Paku

Laban nadai brandy ai vodka dikena nyeruri leka jaku

Tak rerigang ngapa tudah aku baka nyua tawai manuk tuntung

Baka ke lengan kanan aku megai suran genteran sangkuh Agong

Tak bebendar tubuh jara aku tu deka betalatka jalai jaku raban kitai bansa

Ngambika enda luya enda naya tampak rita dipeda dunya

Dia bala anak kitai bansa deka besemekih nyebut dagang

Sama ngulihka reta ringgit wang.

Maya runding benung tusut, nadai buah penemu datai nyeruga endang chukup pedis ka ngasuh jari belanda naip dua tiga leka jaku. Jauh agi ari ke nulis langkar karang ba lambar kertas burak. Endang chukup pedis ka ngasuh untak bepusin ngiga penemu ke patut nyadi karang bacha bala mayuh. Enti diau di nengeri, mayuh tegal enggau penanggul enda ulih nulis laban pengawa ke chukup mayuh semampai enda ulih diseliah. Maya pemisi pulai ke rumah panjai ati chukup lapang sereta tawas. Menua agi chelap lindap, kensung burung chukup manah didinga sereta ribut muputka kayu chukup ngeruga ati ngasaika penyamai utai ke ditempa Petara. Ba perati aku berapa bulan ke udah, chukup mayuh pekara ke enda disadang nuntung ubah pendiau kitai Iban. Iban ke ko aku nya tadi enda ngira sida Iban di menua pesisir tauka di nengeri, baik ke iya diau di Kuching tauka Simanggang, baik ke seranta tauka Iban pemisi, tauka iya Iban bisi pelajar sekula tinggi tauka nadai enggau baik iya Iban rebak baru tauka Iban rebak lama.

Nama kebuah karang tu bisi ditaip ngena leka licha runding mabu aku empu? Kebuah pia laban aku tu jara amat penemu, rapas endar pengelandik di ruang kandang dada, baka ke nyanda penemu bala mayuh meh tudah aku kena nyaut tanya ke digaga aku empu. Kesatu, jeman ke diatu mayuh amat kitai Iban besebutka pengirau ati pasal jaku Iban ke patut diangkun serta peranak Iban endang patut ngetanka jaku Iban empu. Enti ulih jaku Iban tu patut dibai nuju tikas ke tinggi agi ngambika sama bediri degi-degi enggau jaku bansa bukai. Dipeda mata rapas aku empu, diatu jaku Iban empu udah nyadi siti jalai jaku ke diajar ba sekeda sekula di menua Sarawak ari sekula primari nyentukka peresa perintah pom lima. Nambahka nya mega, jaku Iban tu siti ari penemu jalai jaku tauka linguistik ke nyadi kursus nyendiaka pengajar jaku Iban ba sekeda maktab di menua Sarawak enggau di Universiti Pendidikan Sultan Idris. Lalu pia mega bisi serakup ke endang nyulut dalam pengawa ngerembai enggau mansik jaku Iban tu empu. Apin lama ke udah, bisi aum besai jaku Iban tu ti dipujurka ke sida ti endang ngempung pengawa tu.

Nya iya, bisi mega seleka dua penemu mabu tu pansut empa pemuas rangap-rangap nadai pengawa. Pulai baru ngagai randau kitai nya tadi, bakani ngasuh jaku Iban tu kering deh? Naka ke dipelajar ba sebelah sekula, maktab tauka universiti endang enda chukup madahka jaku Iban tu kering. Naka sekeda serakup ke balat kiruh ngemansangka jaku Iban tu endang sigi enda chukup. Ba penemu aku, jaku Iban tu ulih ngerembai sereta kering enti kitai Iban empu megai pengawa dagang besai. Tang bakani ulih mujur dalam pengawa dagang besai enti dagang mit pan kitai Iban nadai mayuh enggau besemekih? Leka jaku ti paling muntang pansut ari mulut kitai bansa iya nya, “ Eh, enda ulih”. Ketegal tiga leka jaku nya aja ulih nagang sereta ngemantulka niat kitai Iban besemekih dalam pengawa dagang. Ba Malaysia pengawa dagang tu endang dikuasa sida bansa Cina. Bansa Cina tu chukup liat ati, ubah pendiau ti chukup mereti dalam pengawa sereta chukup bebendar ngulihka juluk ati sida empu. Nama bida Iban enggau Cina tauka bansa bukai? Sama ga kitai ditempa Petara siku aja, sama ga makai asi, sama ga makai garam semina kitai ke enda chipit mata baka sida, isi kitai enda ngemurak sida. Bida ti chukup besai ti tampak dipeda iya nya ubah pendiau dalam pengawa tauka jaku baru urang kemaya ari tu iya nya disiplin.

Ngangkatka Jaku Iban Bepun Ari Nguasa Pengawa Dagang

Sapa urang tauka bansa ke nguasa pengawa dagang mit nyetukka besai endang chukup bekuasa dalam siti-siti endur tauka menua. Enti bala mayuh sama betatika pekara tu ari cherita lama ke udah dipansik ari dulu menya, pengawa dagang tu endang udah dipejalaika. Ubah pendiau siti-siti bansa nya dipeda nyulut enggau angkat ketegal ari pengawa dagang tu. Uji kitai sama mereti ka dulu cherita lama menua Melaka dalam kandang jeman 1400 kelia endang angkat ketegal menua sida nguasa pengawa dagang. Semua urang nemuai kia laban Melaka endur urang bejalaika pengawa dagang entara menua. Semua barang ke berega bisi dijual dia magang. Entara barang ke chukup laku maya jeman nya kelia iya nya rempah. Rempah tu dibai nuju menua Europe lalu dijual din. Ketungkah ari nguasa pengawa dagang nya tadi, dia deh jaku Melayu nyadi jaku ti ngerembai di serata menua maya nya suba. Jaku Melayu nyadi lingua franca tauka jaku dikena urang pupu bansa ti datai bedagang di Melaka jeman nya suba. Udahnya kitai mereti ka cherita lama menua China, kelimpah ari kuasa soldadu ke kering maya nya suba, menua tu mega sama bejalai ka pengawa dagang serata dunya. Barang menua China ke chukup berega jeman nya iya nya kain sutera. Menua besai India jeman tu suba pan enda kurang nyulut ari menua sida ke bukai dalam pengawa dagang. Semua utai ke disebut ditu endang bisi magang dalam cherita lama ke dipansik kitai jeman ke diatu.

Jeman udah berubah, pengawa dagang tu majak beguna ba semua urang. Serakup tauka bansa saum ati besemekih deka mujur dalam pengawa tu. Dalam karang Tun Dr. Mahathir, The Malay Dilemma bejuraika pengawa dagang tu chukup beguna kena ngangkatka bansa. Enti bansa nya mujur dalam pengawa dagang, sida deka nyadi siti bansa ke nyulut dipeda. Dr. Mahathir mega bejuraika supply chain patut dikena bejalaika pengawa dagang. Reti supply chain tu iya nya serakup tauka bansa ke ngereja pengawa betanam enggau betupi. Bansa tauka serakup ke sama enggau ngereja pengawa betanam betupi nya meli lalu ngaga barang ba kilang ari asil betanam betupi. Raban nya tadi lalu bejualka barang ke udah tembu digaga nya tadi ngagai gudang besai. Udahnya barang ari gudang besai di anjung ke kedai bansa tauka serakup ke sama. Serakup tauka bansa nya tadi mesti meli barang ari kedai nya tadi. Ambi ke banding, bansa Iban ngepunka betanam betupi, bansa Iban ga ke empu kilang sereta bempuka gudang besai. Ukai naka nya aja bansa Iban mega bempuka kedai endur bejual lalu bansa Iban empu ga tebal agi bebelika barang ba kedai bansa diri. Enti supply chain tu mujur, nadai penanggul siti-siti bansa tauka serakup ulih ngemujur ka diri dalam pengawa dagang.

Uji peda bansa Cina ba Sarawak tauka Malaysia tu, sida iya ngena chara supply chain kena ngangkatka diri dalam pengawa dagang. Nama kebuah kitai Iban enda ulih mujur ti bansa bukai ulih mujur dalam pengawa dagang?. Kitai tau nanya diri empu dulu nama kebuah kitai enda tentu mujur dalam pengawa dagang. Ba buah runding tauka penemu aku nadai kebuah kitai enda ulih nitih ka bansa bukai dalam pengawa dagang tu laban kitai agi bisi temuda perimba kena ngepunka pengawa betanam betupi sereta ulih ngiga puku dikena ngepunka industri enggau kedai. Bansa kitai Iban mungkur 30% ari penyampau peranak menua Sarawak. Pekara ke balat nanggul bansa kitai ngemansangka diri dalam pengawa dagang iya nya kepapas tauka egalitarianism. Uji kitai berati sereta berunding enti kitai enggai meda siku-siku urang ke sebansa enggau kitai nya angkat lalu mujur dalam pengidup, bansa kitai baka bangkung lagung-lagung tengah arung enda ulih kulu enda ulih kili. Bakanya mega, urang ke udah angkat nya tadi anang terus ngatika kediri tauka individualism. Iya patut matak bala kitai ke agi di baruh sama niki ke atas sereta ngulurka tangga ngambika bansa Iban sama-sama niki. Mayuh bansa kitai nadai beratika perkara tu nya alai aku muai jam, ngambi pengelelak naip karang nadai rega tu enggau muntanka pengerai nginsap segerit ngichaka anak runding bisi dikena bebungaika jaku ditu. Enti kaul enggau serakup nya renggang dalam siti-siti raban bansa, nya tau dikumbai pelepa nuju pemansang.

Dalam Serakup Malaysia jeman ke diatu, jaku Melayu tauka jaku Malaysia diangkat nyadi Jaku Keterubah ari perambu Tusun Adat menua Malaysia 1957 (Constitution) kelia. Bansa Melayu megai kuasa politik dalam Serakup Malaysia ketegal sida pupu raban bansa ke chukup mayuh tauka majoriti dalam Serakup tu. Kelimpah ari jaku sida nyadi Jaku Keterubah dalam serakup, pengarap ke dikemeranka sida iya Islam mega diangkat nyadi pengarap Serakup Malaysia lalu pengarap bukai tau dikena, dipejalai enggau dipekuh enda ulih lebih ari pengarap Islam. Nyadi ke banding enggau kitai Iban, pekara tu enda ulih dikena kitai ketegal kitai ukai majoriti di Malaysia. Jaku Iban enda ulih angkat lalu bansa bukai nadai tebal nemu ngena jaku Iban. Jaku Iban enda chukup angkat enti naka dipelajar ba sekula, enda chukup ngerembai enti naka nyadi kursus ba palan pematih pengajar enggau enda chukup nyulut enti naka aum besai jaku Iban. Nama kebuah pia, kitai ka meda jaku tu amat-amat bisi endur dalam jalai pengidup di Malaysia.

Bansa Cina ke dibai ngagai Malaya jeman pegai Bristish kelia chukup merinsa. Sida gawa enggau bebendar ba palan ngulihka tin. Gaji jeman nya suba ukai nya besai. Kelimpah ari belanja diri empu, sida mayar ungkus datai gawa di Malaya ngagai ejen sida ngena kengka anak gaji. Di menua Sarawak kelia, bansa Cina bisi dibai tama maya agi dipegai Rajah Brooke. Nyau pengelama diau ditu, dia bansa Cina tu ngepunka pengawa dagang lalu penyampau sida dalam pengawa dagang tu majak mayuh nyentukka sida nguasa pengawa dagang di Sarawak enggau Malaysia nyentukka saritu. Ari pekara tu, kitai sama beratika jaku Cina majak ngerembai taja sida enda megai kuasa politik laban sida nguasa pengawa dagang. Bala anak pupu raban bansa bukai mayuh besekula di sekula Cina, ka minta pengawa ba sebelah kompeni pan ketebal agi endang nemu jaku Cina kelimpah ari jaku Melayu enggau English nya baru bisi agi chara ka bulih pengawa nya. Pia mega dalam pengawa dagang enggau kompeni Cina, enti ulih endang patut nemu bejaku Cina baru mujur agi kaul dagang enggau sida sereta ungkus pan bisi ulih dirunding minta murah agi.

Runding Ubah Pendiau Iban

Ari semua leka jaku ke udah dipeririska aku dia tadi, kitai bala mayuh sama beratika bakani chara kena ngangkatka jaku Iban lalu utai ke patut endar nyadi buah runding kitai iya nya bakani ka ngenanka jaku Iban ba jeman diatu. Munyi ko kupas aku ke dulu tadi, nguasa pengawa dagang (ekonomi) kelimpah ari pelajar sekula enggau universiti sereta aum besai jaku Iban endang jalai ke patut dikena ngangkatka jaku bansa kitai. Ka mujur dalam pengawa dagang kitai ulih ngena chara supply chain. Dikena ngasuh supply chain tu ulih dikena, kitai Iban patut muai antu kepapas, antu benchi, antu bechiping entara diri sama diri. Dikena ngurangka penyakit kepapas tu, bala Iban ke udah dulu angkat tinggi anang tak ngira diri, anang sumbung, anang makai bansa diri enggau anang nipu bansa diri. Tang utai ke patut digaga iya nya betulungka sapa Iban ke agi merinsa, sapa Iban ke agi tusah enda nemu mutarka jalai pengidup, sapa Iban ti agi seranta ketegal tekul laban belanja enggau sapa anak Iban pemegai sijil, diploma, degree, master enggau phd. ke agi kapa-kapa ngiga pengawa. Bala menteri kitai Iban mayuh, bala pengari rayat kitai Iban sangka aku pengabis mayuh di Kunsil Nengeri Sarawak enggau pemegai dagang besai bansa Iban sangka aku bisi bebelas iku di Sarawak. Kini ke penunga menteri, pengari rayat enggau urang bisnes tu deh?

Peranak bansa kitai patut diangkat sama ngambika ngeringka bansa Iban baru jaku Iban ulih mansang. Lalu pia mega peranak Iban enti ka sama mansang bediri tinggi enggau urang patut nemu ngibun pendiau pengidup diri. Tulang anang berat enggau anang leju bejalaika pengawa baikka pengawa di tanah tauka di sebarang endur, penyakit selalu mabuk nya patut dibuai laban arak nya racun ke munuh pendiau bansa kitai enda berasai. Gerempung Dagang Dayak (Dayak Chamber of Bussiness ) di Kuching patut lebih bebendar agi bejalaika atur pengawa dagang enggau mantu sapa bala anak Dayak ke bisi ati besemekih dalam pengawa tu. Anang nyadi gerempung bisi dipeda atas kertas aja tang nadai ulih merambu enggau bejalaika pengawa.

Pengabis Jaku

Nguasa pengawa dagang dikena ngangkatka jaku Iban jalai ke engkeman laban bansa bukai ke deka merambu pengawa dagang enggau bansa Iban mimit-mimit deka belajarka jaku kitai enti sida meda dagang bansa Iban tu mujur. Aku udah bechuanka bansa Cina di Malaysia ba genteran ke dulu agi tadi. Apin aku bejuraika bansa Jipun enggau bansa Perancis, sida iya endang ngangkunka jaku sida dalam bejalaika pengawa dagang enggau menua luar. Urang menua luar ke deka bekaul enggau sida endang belajar ke jaku sida. Ari nya tadi, jaku sida tu ulih ngerembai lalu dipansik ba universiti ngambika dipelajar bagi sapa ke deka nemu jaku sida tu. Kitai Iban kelebih agi patut ngubah pendiau pengidup nuju tikas ke manah agi nya baru jalai pengidup enggau jaku kitai dipeda enggau chukup basa ulih bansa bukai. Aku empu ngarapka jaku Iban tu agi ulih bediri tegap lalu enda lesi ditujah penguji. Aku minta ampun enti jaku Iban aku empu ditu enda engkeman tauka jaku kelalu bisa dibacha. Semua salah enggau pengurang nya datai ari aku, semua pemanah enggau pemaik nya endang ari Petara kitai ti besai. Terima kasih, mupuk dulu aku. (ngelanggak sechangkir kupi ke udah chelap).