Kenang Iban: Pesaka ti Berega

Dikarang: Nicholas J. Ugik (BA, Soc. Sce, UMS)

Lansa Kenang

P

engaya, pengelantang enggau penyenang enda tau dipukul rata sama ba tiap iku urang. Kebuah pia, siku-siku mensia enda sama chara iya ngasai ke penyenang. Ambi ke chunto, bisi urang berasai lantang enti iya mayuh ngembuan ringgit wang tauka bisi sekeda urang ngumbai diri lantang senang enti sida sebilik gerai nyamai sereta nadai kala pungkang pemakai. Ari nya tadi kitai meda pengelandik Petara nempa sereta nyuan gaya pendiau kitai mensia. Pia mega ba genap raban bansa ti bisi di dunya tu sereta raban bansa dalam serakup menua Malaysia (ngambi ke nyamai agi diperati ke kitai) ngembuan chara pengidup enggau pendiau ti nadai sebaka. Bansa Melayu bisi pendiau iya empu, pia mega bansa Cina enggau kitai Iban tauka Dayak bisi chara pendiau kitai empu.

            Sebedau kitai bejurai ke karang tu lebih panjai agi, dia aku deka ngenang sapa kitai Iban tu ke bendar iya. Berindik ari pansik jerita lama (history) bansa Iban tu kelia menya nguan bagi menua Batang Kapuas enggau Batang Merakai, diatu menua nya udah dipegai perintah Indonesia. Ari pengawa kitai bansa ke bisi ngembuan chura pengidup ti dikumbai kitai ‘bejalai’ enggau ‘berimba’ nya alai bala Iban suah ngiga endur berimba baru. Sekali tu tadi sekeda bansa Iban lalu ngejang ari Batang Kapuas enggau Batang Merakai ngiga alai berimba baru. Tu tadi ngepun ke kitai bansa Iban tau bisi ba menua Sarawak baka ke diatu. Kelia menya menua kitai nadai disapat sempadan enggau nadai kuasa perintah megai. Semua raban bansa ba Pulau Borneo jeman nya kelia ulih bejalai enggau mindah peneka ati sida.

            Pengudah Rajah Brooke megai Serawak (Kuching diatu), iya lalu majak ngerekai ke kuasa iya ngagai genap iti endur nyentuk ke pemesai auh menua baruh kuasa iya baka Nengeri Sarawak baka ke diatu. Kitai Iban lalu digela bansa ribai ‘Sea Dyak’ lalu bansa Bidayuh digela ‘Land Dyak’. Kebuah pia laban Raja Berani kitai Iban jeman pegai Rajah Brooke balat nyerang kapal dagang ti mansa Tasik China Selatan enggau kubu perintah ba nanga ai ari pendiau Iban maya nya begiga ke reta temaga enggau tajau. Lalu bansa Bidayuh digela Land Dyak laban sida beridup ba menua bebukit enggau pendiau sida ti bumai bukit.

Jurai Kenang

Pekara ti deka disara kitai ba karang serak tu iya nya berandau ke pesaka berega ba mata kitai bansa. Ba bansa bukai aku enggai nyadi bejaku lebih laban munyi ko aku dulu tadi, chura pendiau enggau jalai pengidup kitai ti nentu ke nama pesaka berega ba genap raban bansa. Nyadi tikas randau kitai tu nguji meda ba bansa kitai Iban. Nyadi aku nguji bejurai ke dua iti pesaka ti pemadu berega ba kitai bansa iya nya; tanah enggau pemandai sekula.

Pesaka ti Berega –Tanah

Endang udah ari jeman aki ini kitai kelia, bansa Iban sigi beridup ba tanah. Baik ke pengawa bumai betaun tauka ngasu beburu. Kitai bansa Iban sigi semampai mindah ari siti endur nuju siti endur ti baru enti nyema tanah ba endur ke lama nyau kusi ti ngujung ke asil bumai betaun nadai mayuh. Pia mega enti jelu babas tauka paku tubu ba endur ke lama nyau pungkang udah tentu kitai mindah nuju endur ti baru. Aki ini kitai neranting tulang berimba ke ke kampung puang alai sida beridup; bumai betaun enggau ngentak ke rumah panjai. Nya alai pendiau kitai bansa Iban tu ngerekai ba segenap endur ba Pulau Borneo tu laban aki ini kitai kering ati merimba menua alai beridup.

            Pengudah kitai dipegai Rajah Brooke, polisi iya nyukung pengawa kitai Iban berimba ke alai beridup baru. Ari nanga ai nyentuk ke entigis ai abis menua udah dipungkal kitai Iban. Ba jalai pengidup kitai Iban, pengerajin tu pekara ti patut bisi ba tiap iku bansa Iban baik indu lelaki tauka tuai biak. Chukup malu enti urang nya enda nurun ke tanah lebuh ari ke manah tauka maya ngereja umai. Chukup malu enti nadai nemu ngereja pengawa tauka mantap ke duku. Siti ari pendiau kitai bansa iya nya malu ka minta enggau malu ka nyanda. Ari nya tadi kitai nguji bumai enggau naka penegar tulang takut ke padi enda chukup nganti ke ngetau ba taun baru.

            Senutuk enggau polisi perintah Brooke nyukung pengawa kitai Iban berimba, nya alai perintah pan bisi ngaga siti adat tanah ti dikumbai Native Customary Rights Land (NCR). Reti iya enti kitai berimba ke tanah nya, kitai meh bempu iya. Besai agi perimba kitai, besai agi ga ungkup kitai. Pengudah NCR tu dipujur ke perintah Brooke, kitai bansa Iban siti ari bansa ba menua Sarawak ngembuan tanah adat ti chukup mayuh. Ari tu tadi, bisi leka jaku Pemakai Menua enggau Pulau Galau nanda ke tanah ti udah diperimba siti-siti rumah panjai sereta adan entara enggau menua rumah panjai bukai. Semua utai tu tadi ari pengering ati enggau pengeregas aki ini kitai kelia.

            Pengudah taun 1945 maya perintah Rajah Brooke (Rajah kepenudi iya nya Charles Vyner Brooke) diganti perintah British, kitai Iban kelebih agi ari pelilih bagi Betong diasuh perintah merimba menua baru Iban ari batang Layar, Awik, Krian, Spak enggau Skrang bisi angkat pindah ke Tubau, Jelalong , Suai, Sibuti enggau Limbang. Perintah lalu meri guna guna kuasa ngagai Penghulu Ulin iya  nya siku tuai bansa Iban asal penatai ari Spak mai bala Iban pindah ngagai endur ke udah disebut aku nya tadi. Nya alai kitai bisi meda peturun Iban ari pelilih Krian, Awik, Spak, Skrang enggau Layar bisi ba sebelah menua Jelalong tauka Sibuti laban aki ini sida ti udah pindah kelia. Lalu pia mega, tanah perimba kitai bansa ba endur nya pan bisi lalu nyadi pesaka ngagai peturun sida ke baruh hari tu.

            Pekara tu patut ngasuh kitai betanya ngagai diri sama diri. Nama kebuah enggai enda bansa Iban diasuh perintah Rajah Brooke enggau British merimba menua enggau mungkal endur baru? Saut iya bisi ba tiap iku kitai ke macha karang tu. Aku empu bisi saut aku empu. Mulai ke kenang kitai ngagai pesaka ti berega iya nya tanah tu, kenyau ari taun 1970-an kelia kitai Iban tau dikumbai nyadi juluk ati ba bala urang ti balat ingin ke tanah kitai bansa. Kenyau ari taun 1990-an kiti mega meda mayuh kitai Iban nurun niki court laban bechara ke tanah ti besangkut paut enggau kompeni batang, kompeni kebun bedandang besai enggau ulah siku dua urang politik. Mayuh udah penyarut dipeda kitai beduduk ari tanah NCR tu. Aku empu enggai nyadi bejurai ke penanggul lebih dalam agi  enggai ke dipeda urang ari sukut pikir politik ti ngujung ke urang salah anggap. Bala mayuh lebih nemu jerita ti bendar.

            Apin lama ke udah dalam taun 2018 tu tadi, kitai bisi ninga perintah Nengeri Sarawak udah bisi udah ngubah (amendment) undang-undang tanah NCR tu. Sebubu jaku kenang bala mensia bekaul enggau pekara tu. Sekali agi aku nanya bala mayuh senenang undang-undang baru tu, untung tauka rugi kitai Iban? Saut nya bisi ba kita. Laban kitai Iban endang udah jeman iya beridup ba tanah, aram meh kitai ngenan ke pesaka kitai tu. Sekali nuan berunding ka nyual iya, tak nyentuk ke peturun ichit nuan pan bedau temu ulih nebus tanah ti dijual tadi. Sekali kitai enda ibuh ke penanggul undang-undang tanah, seumur idup kitai nesal nadai badu laban lenyau reta pesaka.

Pesaka ti berega- Pelajar Sekula

Bepelasar ke kenang jerita tuai, kitai Iban tu nadai nemu urup tulis. Nya alai kelia semua penemu ba leka main Iban, adat enggau jerita semua ditusui ari siti serak ngagai siti serak ti baru. Semua nya dikingat lalu ditampung ngambi ke bisi nyadi penyanding rebak dudi. Ari batang pengidup, kitai bansa Iban munyi ke udah dikenang aku dulu tadi endang beridup ba tanah ari ke betanam betupi, nubai mansai sereta ngasu beburu. Dulu menya kitai ngemeran ke pengawa bumai betaun. Nya alai aki ini kitai kelia seruran mindah alai ngentap ke diri ketegal ngiga tanah ti manah endur bumai enggau babas ti bisi diuan jelu siga.

            Endang gaya kitai nitih ke putar dunya ti majak mansang, kitai mansang ke mua mesti bisi ngembuan penemu baka bansa ti udah dulu mansang kelebih agi ba industri enggau teknologi. Ba menua Europe empu kelia dalam taun 1600, sida tu asal iya ari pengawa bekebun enggau betupi. Ari pemandai runding dalam guna teknologi, sida iya berubah ngagai kebun bedandang besai sereta asil ti belimpah agi ari ke udah ti digela urang Revolusi Pertanian. Pengudah sida tu nyulut dalam pengawa bekebun bedandang besai, urang Europe lalu ngalih ngagai pengawa industri. Ba pengawa industri, pansik , injin stim enggau teknologi dikena ba kilang ngeluar ke barang ti diguna mensia mayuh. Asil ari utai tu tadi mai menua Europe dulu nyingkang ke mua ari menua bukai dalam dunya tu jeman taun 1600 kelia. Nya alai mayuh anak kitai anak Iban patut ngembuan penemu ti bakanya. Chara iya nadai jalai muntang enti ukai ari pelajar sekula. Pia mega pelajar sekula ti siti ari chara kitai deka mai ubah ba tikas pengidup kitai sebilik.

            Pengawa bersekula tu tau dilebas ke kitai ngagai dua bagi; tanggung pengawa apai indai enggau tanggung pengawa nembiak sekula. Apai indai enggau nembiak sama besemekih enggau pengajar ngemansang ke pengawa sekula. Keterubah aku deka nyara penemu ba tanggung pengawa apai indai. Aku pechaya apai indai nganjung anak bersekula ketegal ka ngasuh pengidup bala anak sida meruan dudi hari kelimpah ari deka ngubah tikas pengidup ngambi ke nyamai agi. Nya alai apai indai dilalau ngambi ke anang bechiping ati dalam pengawa nyengula ke anak. Anak besekula tu sempama nuan nanam puku dalam saham. Asil anak saham tu meh dikena nuan dudi hari ia. Tambah pia, pengawa bersekula tu selalu dipeda kitai dilempai ba tanggung pengawa bala pengajar aja. Ya, endang amat nya tanggung pengawa pengajar ti ngajar nembiak tang kira ke manah agi enti bisi saup ari apai indai ti sama-sama ngelalau nembiak kelebih ari lebuh anak sida tu di rumah.

            Kelimpah ari nya, anak ke besekula mesti bisi juluk ati diri empu ti ka mujur dalam pengawa bersekula. Tu dikumbai urang ‘internal motivation’ tauka peransang ari dalam ati diri. Nadai urang ulih nulung kitai enti ukai ari pemendar ari kitai empu. Patut anak sekula nemu reti tuju pelajar sekula tu munyi ke udah dikenang kitai dulu tadi. Penyampau bansa kitai Iban ti udah bisi ngembuan pelajar tikas degree engka agi tinggal ari bansa bukai. Pekara tu mesti bisi dalam runding ngambi ke bebendar agi kitai ngemaju kediri dalam pengawa besekula.

            Kena nambah ke tanggung pengawa apai indai enggau nembiak dalam pemujur pengawa besekula, aku meda kitai Iban mayuh ke udah mujur dalam pengawa begaji besai sereta bisi ngembuan kompeni dagang kediri empu. Anggap meh tu tanggung pengawa ngagai bansa kitai empu enti meri munggang ringgit dikena ngatur program mantu nembiak Iban dalam pengawa besekula. Tu meh maya kitai ngempung diri enti ba pekara bukai kitai Iban enda ulih sama runding enggau sama jaku.

Nyimpul Randau

Kira simpul ngena jaku pandak, pesaka kitai Iban ti berega iya nya tanah. Kebuah pia laban pengidup kitai Iban endang beguna ke tanah dikena bumai betaun, betanam ke engkayu sepun dua, endur ngasu beburu, maku nubu enggau mansai nubai enti ba endur nya bisi ai sungai. Aki ini kitai kelia jeman ti udah rimpi babun patah, udah lesi nangga hari udah parai nangga lemai dikelala ari pengawa sida ti kering berimba ke kampung puang dikena ngepun ke pengidup. Aki ini kitai enggau naka pengeliat ati neresa endur baru ngambi ke peturun sida enda suntuk temuda perimba dikena beridup. Pekara tu meh patut ditemu kitai bansa Iban ngambi ke buah tanah enggau temuda perimba kitai enda lenyau ngagai jari urang bukai. Siti agi pesaka iya nya pelajar sekula. Iya disema ke kitai enda dipeda asil ba pun pengawa tang mansut asil iya chukup galak ba ujung. Iya sempama pesaka lalai ti ditemu urang ti amat-amat ngembuan pengeran ati dalam pelajar sekula. Munyi ke udah dikenang, pelajar sekula tu baka ke nanam saham. Nuan amat merinsa maya ke nyengula ke bala anak kelebih agi ba duit ringgit. Tang enti pelajar sida tu mujur, iya tau mai ubah pendiau kitai ngagai tikas ke meruan agi. Pengabis jaku aku, sama meda urang meda diri, minta ampun enti kair jari tu enda engkeman ba ati siku-siku urang. Terima kasih.